entreprendre d’enleuer Clelie du Palais d’un Prince tel que Tarquin. En ſuite dequoy paſſant d’une choſe à vne autre, ils voulurent deuiner ce que feroit ce Prince violent quand il ſçauroit ce qui s’eſtoit paſſé : car les vns diſoient qu’il ſe porteroit à la derniere extremité contre le Prince de Numidie : quelques vns, que par ſon propre intereſt il auroit quelque conſideration pour la qualité de Maharbal ; & quelques autres, qu’il le feroit empoiſonner. Aronce qui eſtoit infiniment genereux, & qui auoit eſté touché de la derniere conuerſation qu’il auoit euë auec cét illuſtre Riual, auſſi bien que de la Lettre qu’il luy auoit laiſſée en partant de l’Iſle des ſaules, pria Amilcar d’aporter ſoin à empeſcher qu’il ne fuſt mal traité : & en effet Amilcar agit auec tant d’adreſſe aupres de Tullie, & il eſcriuit d’une maniere
