mitié qu’ils auoient leur faiſoit ſentir ; mais pour Brutus, & pour Herminius, ils auoient tous deux pluſieurs intereſts au lieu d’un, puis qu’ils auoient celuy de leur Amy, de leur amour, & de leur Patrie ; & les choſes eſtant alors au meilleur eſtat qu’ils les euſſent veuës depuis tres long temps, ils auoient leur part de l’eſperance. Ce n’eſt pas que Brutus du coſté de Lucrece eſperaſt rien qui luy pûſt eſtre auantageux : mais il penſoit du moins alors que s’il pouuoit détruire Tarquin, il détruiroit auſſi Sextus : ſi bien qu’un ſentiment ialoux excitant encore en luy le deſir de ſe vanger, & celuy de deliurer Rome, il luy ſembloit qu’il ne deuoit pas moins agir contre Tarquin en qualité de veritable Amant, que de veritable Romain. Ainſi l’eſperance trouuant place dans le cœur de tant d’honneſtes gens, quand ils eſtoient le ſoir enſemble
