plus fortement ſon eſprit, il reſolut de la faire venir au Camp, afin que Tullie ne pretendiſt pas en eſtre la Maiſtreſſe, diſant tout haut à vn des Miniſtres de ſes paſſions, qu’il falloit abſolument qu’elle ſatiſfiſt ſon amour, ou qu’il contentaſt ſa vangeance. Pour Herminius il fit deſſein de promettre de grandes recompenſes à ceux qui le luy liureroient viuant ou mort. Il reſolut auſſi de faire les meſmes promeſſes à ceux qui luy ameneroient Aronce : & quant à Artemidore, Zenocrate, & Celere, il teſmoigna eſtre fort irrité de ce qu’ils auoient fait. Brutus apprenant tant de choſes importantes à la fois, ſans qu’on ſongeaſt à ſe cacher de luy, penſa à auertir du moins ſes Amis, qui eſtoient à Collatie. Mais comme il ne vouloit pas confier legerement à autruy ce qu’il ſçauoit, il ſe reſolut
