Pometie & Titus, tous ſpirituels qu’ils eſtoient, auoient expliqué la choſe ſelon le ſimple ſens des paroles, & auoient mis au ſort entre eux qui ſaluëroit la fiere Tullie le premier ; eſperant par là exclure le Prince Sextus leur frere, quoy qu’il fuſt l’aiſné de la Maiſon. Mais Brutus ſans les déſabuſer de leur erreur, chercha vn autre ſens aux paroles de l’Oracle ; car s’imaginant que la terre eſt la Mere commune de tous les hommes, il fit ſemblant de ſe l’aiſſer tomber, & baiſant la terre, il remercia les Dieux de luy donner quelque eſperance de pouuoir vn iour finir le regne d’un ſi cruel Tiran. Cette eſperance eſtoit pourtant bien affoiblie lors que le Prince de Pometie & Titus luy demanderent s’il vouloit aller à Rome auec eux, puis qu’il ſe voyoit en eſtat de craindre la cruauté de Tarquin pour les Perſonnes du monde qu’il aimoit le plus.
