qu’elle ne le face auec vn empreſſement que ie ne luy voy pour nulle autre choſe. Elle a dans la mémoire toutes les iniuſtices de Tarquin, & toutes les cruautez de Tullie ; elle ſçait iuſques aux moindres paroles genereuſes qu’ont dittes tous ceux qu’ils ont exilez ou fait mourir ; & elle tire de la conſtance de tant d’illuſtres malheureux des conſequences infaillibles, qui luy font croire que Tarquin perira. Si bien qu’elle ne ſe laſſe point de me dire qu’il vaudroit beaucoup mieux que ie demeuraſſe paiſiblement à Collatie que de m’attacher à voir ſi aſſidûment le Roy. Il y a long temps (reprit froidement Lucretius, en ſe ſouuenant de la Lettre qu’il auoit autrefois trouuée) que ma fille hait horriblement Tarquin, ſans qu’elle en puiſſe bien dire la raiſon : car les Perſonnes de ſon âge n’ont guere accouſtumé de ſe meſler de Politique. Bru-
