de ceux dont il auoit voulu éuiter la rencontre. Mais à peine eurent-ils marché vne demie heure, que Collatin vit paroiſtre vn des Eſclaues de ſa femme qui venoit vers eux, & qui venoit auec vne precipitation extréme, faiſant aiſément connoiſtre qu’il y auoit quelque choſe de fort preſſé qui l’obligeoit de marcher auec tant de diligence. De ſorte que Collatin s’auançant, d’où vient, luy dit-il, que tu va ſi viſte ? eſt-ce Lucrece qui t’enuoye vers moy pour quelque affaire preſſée ? ouy Seigneur, repliqua cét Eſclaue, & i’ay ordre de vous dire de ſa part, & à ſpurius Lucretius auſſi, qu’il importe extrémement qu’elle vous voye tous deux le plus promptement qu’il vous ſera poſſible. Elle vous mande meſme que ſi vous pouuez mener quelques vns de vos Amis particuliers aueque vous, elle en ſera fort aiſe. Mais ne ſçais-
