eux ils paſſerent deuant la Maiſon où eſtoient Aronce, Herminius, Artemidore, Zenocrate, & Celere. Mais Brutus ne tourna pas ſeulement la teſte de ce coſté-là ; & pour Lucretius & Collatin, ils ne ſongeoient pas meſme que Tarquin les enuoyoit à Collatie, tant ils auoient l’eſprit occupé du meſſage qu’ils auoient reçeu. Cependant dés qu’ils furent deſcendus de cheual, ils voulurent entrer dans la Maiſon : & à peine furent-ils ſurle haut d’un Perron qu’on trouuoit apres auoir trauerſé la Cour, qu’ils virent paroiſtre la belle & Vertueuſe Lucrece à l’autre coſté d’un grand veſtibule qui eſtoit au bas de l’Eſcalier : mais ils la virent negligée, paſle, & melancolique : & ils virent dans ſes regards de la douleur, de la colere, & de la confuſion. Il eſt vray qu’elle rougit eſtrangement lors que venant à leuer les yeux pour com-
