tout contribuaſt à ce qu’ils alloient entreprendre. Lucretius de ſon coſté eſtant alors Gouuerneur de Rome, enuoya dire à ceux qui dépendoient de luy qu’ils ſe tinſſent preſts pour quelque expedition ; deffendant à celuy qu’il y enuoya, de rien dire de l’accident de Lucrece. Et en effet le Chariot qui portoit le corps de cette admirable Perſonne arriua à Rome ſans qu’on en ſçeuſt rien. Mais lors qu’il fut à la porte, Brutus qui ne doutoit pas que la veuë d’un ſi triſte obiet, n’attendriſt, & n’irritaſt le cœur du Peuple, & ne le portaſt en ſuite au ſoûleuement, tira luy meſme ce grand drap de deüil qui couuroit vn ſi beau corps, mais en le tirant il deſtourna la teſte pour cacher ſa douleur à Collatin. Apres quoy ce Chariot deſcouuert entra dans la Ville, ſuiuy de Brutus qui tenoit le Poignard ſanglant à la main, du Pere & du Mary de Lucrece, dont les yeux
