entend tout ce qu’on dit finement, & y reſpond de meſme : & elle eſcrit des Billets ſi doux, ſi plains d’eſprit, & d’un ſtile ſi aiſé, ſi naturel & qui ſent ſi fort ſa perſonne de qualité, qu’on ne l’en ſçauroit aſſez loüer. Mais ce qu’il y a de plus admirable en Philonice, c’eſt qu’elle a vne Vertu ſolide ſans eſtre ſauuage ; qu’elle ayme la gloire plus que toutes choſes ; qu’elle a le cœur tendre & l’eſprit ferme ; & que ſon amitié eſt eſgallement conſtante, agreable, & ſincere. Elle eſt auſſi tres-adroite à tout ce qu’elle entreprend, car on ne peut pas mieux dancer qu’elle dance, elle ſçait pourtant ſe priuer de ce diuertiſſement ſans beaucoup de peine ; car elle n’eſt iamais capable de nul emportement ; elle eſt ieune & ſage tout enſemble ; elle a du iugement ſans experience, & de la prudence ſans orgueil, & elle eſt enfin ſi accom-
