Le texte de cette page a été corrigé et est conforme au fac-similé.
Car ie nauoye intencion
dauoir drap par la paſſion
de noſtre ſeigneur quant ie vins
Jauoye mis a part quatre vings
eſcus pour retraire une rente
mais vous en aurez vingt ou trente
ie le vois bien car la couleur
m’en plaiſt treſtant que ceſt douleur
Le Drappier
Eſcus voir. ce pourroit il faǐre
que ceulx dont vous devez retraire
ceſte rente priſſent monnoye
Pathelin
Et ouy bien ſe ie vouloye
tout men eſt ung en paiement
quel drap eſt cecy vraiyement
tant plus le vois et plus maſſotte
Il men fault auoir une cotte
bref et ma femme de meſme
Le Drappier
Certes drap eſt cher comme creſme.
vous en aurez ſe vous voulez
dix ou vingt frans y ſont coulez
ſi toſt.
Pathelin
Ne me chault couſte & vaille