du nom de ce Roy. Joinct que les Tartares (encores qu’ilz soient fort cruelz & sans pitié) ne veulent jamais violer les sepultures, n’autres choses qui concernent les trespassez. En ceste province y a grande quantité d’elephans, & de beaulx & grandz buffles, cerfz, dains & autres diverses especes de bestes saulvages.
De la province de Bangala. Chap. LV.
a province de Bangala sur la coste de Midy, est prochaine & contigue a l’Inde, laquelle n’avoit encores esté conquestée par le grand Cham lors que je demourois en sa court : toutesfois il avoit dressé & envoyé une grosse armée pour la subjuguer & rendre tributaire. Ceste region à son Roy & langaige propre & particulier. Tous les habitans d’icelle sont idolatres, qui vivent de chair, de riz & de laict. Ilz ont grande quantité de soyes & cotton, a cause desquelz se font au pays plusieurs grandes foires & marchez. Aussi y a grande abondance de spicnarde, galange, gingembre, sucres, & autres diverses espiceries. Oultre y a de grandz beufz, & aussi gros qu’elephans, mais non du tout si grandz. Ilz ont une tresmauvaise coustume de chastrer les enfans, pour en apres les vendre aux marchandz qui les transportent en diverses provinces.
