sont tous lieux champestres & bocaiges fort commodes pour la chasse & vennerie, aussi on y trouve grande quantité de connilz, plus grands sans comparaison que les nostres.
De la cité de Crerman. Chap. XXI.
rerman est une cité de belle merque & bien renommée, es montaignes de laquelle se trouve grande quantité de pierres précieuses, qu’on appelle turquoyses. Andavicum pour bronze, ex Munstero. Aussi y a des mines d’acier & de bronze : semblablement on y trouve des faulcons excellens, & qui volent de grande vivacité, & vistesse, toutesfois ilz sont pluspetitz que les faulcons passagers. En Crerman y a plusieurs artizans, mesmes armuriers de toutes sortes d’armes, qui forgent & fabriquent freins, esperons, selles, espées, arcs, trousses & autres harnois, selon l’usaige du pays. Les femmes sont destinées à autres ouvraiges, mesmement à la plumasserie dont elles font de braves lictz, mattelatz, oreillers, traversins & choses semblables de grande excellence. A l’issue de la ville de Crerman, tirans oultre, on trouve une grande plaine qui contient environ sept journées de chemin, & jusques à ce qu’on vient à une grande vallée qui ne peult estre passée en deux jours entiers que tousjours lon ne voyse en devallant. Or en ceste plaine qui est fort habitée on trouve grande quantité de perdrix, & y a de beaux chasteaulx & bourgades, mais en la vallée aucun n’habi-
