lesdits Cosaks comme tous ceux desquels auons parlé icy deuant, sont gens de pied, et ainsi se doit entendre en tout ce present discours, et non caualiers comme sont les Cosaks qui resident en la Podolie et la Russie noire, sous la domination du Roy de Pologne, lesquels l’on a veu deçà et delà aux armées, tant en Transsiluanie, Valachie, que Moldauie et autres lieux, lesquels Cosaks estoient d’ancienneté montez et armez comme sont les Tartares, et continuë le tout, sinon que depuis peu de temps : la pluspart se sont seruis d’harquebuzes, mais ils ne portent nulles armes deffensives, si ne mettez au nombre d’icelles le cimeterre, lesquels faisoient du dommage du long de la Volga, et disoient auoir auec eux vn ieune Prince nommé Zar Pieter, lequel estoit vray fils (comme ils en faisoient courir le bruict) de l’Empereur Theodore Iohannes, fils de Iohannes Basilius, et de la sœur de Boris Federuits, qui regna apres ledit Theodore, lequel nasquit enuiron l’an 1588. et fut secrettement changé ; car l’on supposa selon leur dire, vne fille en sa place laquelle deceda aagée de trois ans, comme auons touché cy-devant. Tellement que ce Zar Pieter pouuoit estre aagé de seize à dix-sept ans, si leur dire eust été vray ; mais l’on sçauoit bien que ce n’estoit qu’vne couleur qu’ils prenoient pour piller le païs, pour quelque mecontentement que lesdits Cosaks auoient du dit Demetrius, eu egard qu’ils ne furent recompensez d’iceluy, comme ils esperoient. Nonobstant l’Empereur luy escrit vne lettre, par laquelle il luy mandoit, que s’il estoit le vray fils de Theo-
