pres de quinze, tant villes que chasteaux, et son armée se renforçoit tous les iours. Or de dire que ce soit vn imposteur, qui a entrepris ces choses de soy mesme, il me semble que ce seroit vne simplicité de croire que n’ayant que 20. ou 21. ans lors qu’il se descouurist, eust appris à cest effect la langue Russe tant de temps auparauant, et mesmes à lire et escrire ; combien que l’on peut demander où il l’auroit appris, puisqu’il eust l’entendement et discretion de respondre à chaque question qu’on luy fist, comme i’estime lors qu’il se descouurit ; car la Russie n’est pas vn païs libre, auquel on puisse entrer pour apprendre la langue, s’informer de telle et telle chose, puis en sortir, car outre ce qu’il est fermé, comme auons ia touché, toutes choses y sont si secrettes, qu’il est fort difficile d’apprendre la verité d’vne chose, si on ne l’a veu de ses propres yeux. Aussi ie ne pense estre vray-semblable, qu’il eust peu conduire cette menée sans qu’aucun l’eust sçeu. Or si quelques-vns l’eussent sçeu, ils se fussent descouuerts pendant sa vie, ou apres sa mort, enfin s’il eust esté Polonnois, il se fust comporté autrement enuers quelqu’vn d’iceux, qu’il ne fist et ne pense pas que le Palatin Sendemier, se fust tant hasté à lui faire aucune promesse, auant qu’il eust esté mieux informé de ce qu’il estoit. De dire qu’il ne l’ignoroit pas, il n’est vray-semblable, comme nous toucherons cy-apres.
Quant à ceux qui tiennent qu’il a esté nourry et eslevé par les Iesuites, de quelle nation tiennent-ils qu’il fust ; car il n’est pas Polonnois, comme il appert cy-dessus, et toucheray
