que le Dimanche : combien qu’il n’y a feste si grande, en laquelle ils ne permettent d’ouurir les boutiques, et trauailler à ce qui leur est necessaire apres midy. Ils ieusnent le Mercredy et le Vendredy, et outre ce ont quatre Caresmes en l’an : asçauoir le grand Caresme, duquel nous parlerons cy-apres : deux autres chacun de quinze iours et le quatrième, qui commence huict iours auant la Sainct Nicolas, et finist à Noël, lesquels ils obseruent aussi estroitement que faire se peut, ne mangeans œufs ny aucune chose qui prouienne de chair. Ils ont les Sainctes Escritures en leur langue, qui est Esclauonne. Ils font grand compte des Pseaumes de Dauid. L’on n’y presche iamais, ains à quelques festes ils ont certaines leçons qu’ils lisent de quelque chapitre de la Bible ou nouueau Testament, mais l’ignorance est telle parmy le peuple, qu’il ne se trouuera pas le tiers qui sçache que c’est de l’Oraison Dominicale et Symbole des Apostres. Enfin on peut dire l’ignorance estre mere de leur deuotion. Ils abhorrent les estudes, et principalement la langue Latine. Il n’y a aucune Escolle ny Vniuersité entre-eux. Les prestres seuls enseignent la ieunesse à lire et à écrire, à quoy peu de gens s’addonnent. La plus grand’part de leurs caracteres sont Grecs, et sont presque tous leurs Liures escrits à la main, fors quelque Bible et nouueau Testament qu’ils ont de Polongne, lesquels sont imprimez. Car il n’y a que dix ou douze ans qu’ils ont appris à imprimer, et sont encore pour le iourd’huy les Liures escrits plus recherchez que les imprimez. Deux
