tement la porte, & le meit dehors. En ceſt inſtant ſ’eſueilla le gentilhomme, lequel voyant approcher l’heure qui luy eſtoit donnée du beaupere, pour aller veoir ſa femme, ſe leua en ſa robbe de nuit, & ſ’en alla viſtement coucher, ou par l’ordonnance de Dieu ſans congé d’homme il pouuoit aller. Et quand ſa femme l’ouït parler aupres d’elle, ſ’eſmerueilla ſi fort, qu’elle luy diſt, ignorãt ce qui eſtoit paſſé : Comment, monſieur ! eſt-ce la promeſſe que vous auez faicte au beaupere, de ſi bien garder voſtre ſanté & la mienne, de ce que non ſeulement vous eſtes venu cy auant l’heure, mais encores y retournez ? Ie vous ſupplie, monſieur, penſez y. Le gentil-homme fut ſi troublé d’ouïr ceſte nouuelle, qu’il ne peut diſsimuler ſon ennuy, & luy diſt : Quels propos me tenez vous ? Ie ſçay pour verité qu’il y a trois ſemaines, que ie n’ay couché auec vous, & me reprenez d’y venir trop ſouuent. Si ces propos continuent, vous me ferez penſer que ma compaignie vous faſche, & me contraindrez, contre ma couſtume & volonté, de chercher ailleurs le plaiſir que ſelon Dieu ie puis prendre auec vous. La damoiſelle, qui penſoit qu’il ſe mocquaſt, luy reſpondit : Ie vous ſupplie, monſieur, en me cuidant tromper, ne vous trompez vous meſmes : Car nonobſtant que n’ayez parlé à moy quand vous y eſtes venu, ſi ay-ie bien cogneu que vous y eſtiez. A l’heure le gentilhomme cogneut qu’ils eſtoient tous deux trompez, & luy feit grãd ſerment qu’il n’y eſtoit point venu. Dont la dame print telle triſteſſe, qu’auec pleurs & larmes le pria faire toute diligence, de ſçauoir qui ſe pouuoit eſtre : car en leur maiſon ne couchoit que le frere d’elle, & le cordelier. Incontinent le gẽtil-homme poulſé de ſoupçon du cordelier, ſ’en alla haſtiuement en la chãbre ou il auoit logé, laquelle il trouua vuide. Et pour eſtre mieux aſſeuré ſ’il ſ’en eſtoit fuy, enuoya querir le portier, auquel il demãda ſ’il ſçauoit point qu’eſtoit deuenu le Cordelier, lequel luy compta la verité. Le gentil-homme certain de ceſte meſchanceté, retourna en la chambre de ſa femme, & luy diſt : Aſſeurément, m’amie, celuy qui a couché auec vous & faict tant de beaux œuures, eſt noſtre pere confeſſeur. La damoiſelle, qui toute ſa vie auoit aimé ſon honneur, entra en tel deſeſpoir, que oubliant toute humanité & nature de femme, le ſupplia à genoux, la venger de ceſte grande iniure. Parquoy ſoudain fans
Page:Marguerite de Navarre - L'heptaméron des nouvelles, 1559.pdf/204
Le texte de cette page a été corrigé et est conforme au fac-similé.
LA III. IOVRNEE DES NOVVELLES
autre
![](http://upload.wikimedia.org/wikipedia/commons/thumb/f/f4/Marguerite_de_Navarre_-_L%27heptam%C3%A9ron_des_nouvelles%2C_1559.pdf/page204-1024px-Marguerite_de_Navarre_-_L%27heptam%C3%A9ron_des_nouvelles%2C_1559.pdf.jpg)