Le texte de cette page a été corrigé et est conforme au fac-similé.
80
L’INQUISITEUR
Jacot.
Puisque ne voullez qu’il soit vostre
Ainsi comme je l’avoys dict,
C’est donq le Père qui est nostre
Où vous avez peu de crédit.
L’Inquisiteur.
Je n’ay que faire de sa grâce,
Ne de tes parens & cousins ;
Perrot.
Aussi, Monsieur, bien il se passe
De vous ; il a de bons voysins.
L’Inquisiteur.
Quel est son nom ? Ne le cellez ;
Dy aussi le tien de toy mesmes ;
Jacot.
Monsieur, pour le savoir allez
Au Prebstre qui fist son baptesme.
L’Inquisiteur.
Comment l’appelles-tu ?
Thierrot.
Il vient
Tousjours à moy sans l’appeller ;
Le lieu est hault où il se tient ;
Monsieur, vous n’y sçauriez aller.
L’Inquisiteur.
Nommez moy la maison, la rue ;
A quelle enseigne est ce que c’est ?
