Parole aussi qui de mentir n'est lasse !
Vous avez tort
D’une tromper qui vous ayme si fort.
Voilà comment Terre et Ciel font effort
De me donner un peu de reconfort.
Car bien entendent
Mon piteux cas, dont secours ilz attendent
De Dieu, à qui seul pour moy le demandent.
Prier pour moy sans cesser ilz prétendent.
O Terre et Cieux,
Ne soyez point de moy si soucieux,
Ne de punir mon amy envieux :
Plus me seroit son ennuy ennuyeux
A soustenir
Que tout le mal qui me sçauroit venir.
Helas, mon Dieu, ne le vueillez punir,
Et mettez hors de vostre souvenir
Sa faulseté.
Soyez luy doux, ainsi qu’avez esté
Au faux Judas plein de meschanceté :
Car s’il falloit de sa grand lascheté
Qu’il fust mémoire,
J'aymerois mieux la honte pour luy boire
Que de souffrir que l’on en sceust l’histoire.
Bien que ce fust à mon honneur et gloire.
Mais quel honneur
Seroit ce à moy d’avoir laissé mon cœur
