LETTRES INÉDITES LETTRE XL.
AU ROI. (Mai 1527.)
Monseigneur, l’honneur et bien que ce m’est de si souvent avoir de vos lectres tant estimées me fait redoubler l’aise que mon continuel mal jusques icy proumet’. Et quant aultre chose n’en viendroit que
de vous en donner ung peu de contentement, si m’en tiens-je heureuse. Mais, Monseigneur, tout cecy tourne en ennuy, voyant la santé de madame qui ne peult porter ce qu’elle desire, qui est de vous aller voir. Car despuis mercredy elle s’est trouvée beaulcoup plus mal qu’elle n’avoit esté despuis qu’elle a coumencé à se lever ; et pour s’estre esforcée de s’avancer plus qu’elle ne povoit, elle a retardé sa parfaite guerison, et encores à ce matin a eu grant vomissement et desgoustement, en sorte que les médecins doubtent qu’il y a quelque pierre, pour ce qu’elle n’a bougé de couchée despuis vostre partement, sinon ung jour ou deux, qu’elle alla jusques en la garderobe. Et quant tout est dist, je croy que le plus grant desplaisir que son mal luy fasse, c’est qu’il la garde d’estre auprès de vous. Mais voyant sa debilité et temps qu’il fait, sans grant dangier il seroit impossible qu’elle partist. Elle commencait une grossesse.
