Amis ! si jeo puis eschaper
J’alasce ù fustes mis en mer[1] !
Quant ce ot dit se liève sus,
Tute esbahie vint à l’hus,
N’i trova cleif ne serréure,
Fors en issi par aventure.
Unques nul ne la destorba,
Au hafne vint, la neif trova,
Atachiée fu al rochier,
U èle se voleit néier.
Quant el la vit, enz est entrée ;
Mès, d’une rien s’est porpensée,
K’iloec fu sis amis néiez,
Dunc ne peut ester sor ses piez,
Se dusque al port péust venir,
Ele se laissast jus caïr.
Assez soeuffre travail et paine,
La neif s’en veit qui tost l’enmeine :
En Bretaigne est venue al port,
Sus un chastel vaillant è fort.
Li Sires ki le castiaus fu
Aveit à nun Mériadu ;
Si guerroioit un sien veisin,
Pur ceo fu levé par matin,
Sa gent voleit fors envéier,
- ↑
Là ù vus fustes mis en mer
Me mettrai ; dunc liève sus.