Mès tusjurs est pensive è murne ;
Il veit sovent à li parler,
Kar de bon quoer la vot amer.
Il la requert, èle n’a cure,
Ainz li mustre de la ceinture,
Jamès hume n’en amera,
Se celi nun ki l’overa
Sans dépescier ; quant il l’entent
Lors li respunt par maltalent :
Ensement ad en cest païs
Un chevalier de mult grant pris,
De femme prendre en itel guise,
Se deffent par une chemise,
Dunt li destres pans est pléiés,
Il ne peot estre desliés ;
Ki force, u coutel ni metoit,
Vous fesistes, jeo quit, cel ploit.
Quant el l’oï si suspira,
Pur un petit ne se pasma :
Il la retint entre ses bras,
De sen bliaut[1] trença les laz,
La ceinture voleit ovrir,
Mès il n’en pot à cief venir ;
Puis n’ot el’ païs Cevalier,
Ki ni venist por assaier.
Ensi remist bien lungement
Deci qu’à un turneiement,
Que Mériadus afia
- ↑ Sorte de vêtement de dessus. En patois périgourdin, on appelle encore blaoudo un jupon.
Voyez la note du Lai de Lanval