Mut est sis quors en grant destreit,
Kar volentiers assaiast,
S’ele le peut u ele osast.
Bien s’aperçeit Mériadus,
Dolans esteit, ainc ne fu plus ;
Dame, fet-il, kar assaiez
Se le defferre le poriez,
Quant ele ot le commandement
Le pan de la chemise prent,
Légièrement le despléiat.
Li Chevaliers s’esmerveillat
Bien la connut, mès nequedent
Ne le pot creire fermement,
A li parlat en tel mesure.
Amie, duce créature
Estes-vos ? çou dites le moi,
Est-ce vostre cors que je voi
La ceinture dont jeo vus ceins ?
A ses costez li mit ses meins,
Il ad trovée la çainture.
Bele, fet-il, qu’ele aventure,
Que jeo vus ai issi trovée,
Ki vous ad ici amenée ?
Ele li cunte la dolur,
Les granz paines è la tristur,
De la prisun là ù el fu,
E coument li est avenu,
Coument ele s’en escapa.
Page:Marie de France - Poésies, éd. Roquefort, I, 1820.djvu/124
Cette page a été validée par deux contributeurs.
108
LAI DE GUGEMER.
![](http://upload.wikimedia.org/wikipedia/commons/thumb/7/7c/Marie_de_France_-_Po%C3%A9sies%2C_%C3%A9d._Roquefort%2C_I%2C_1820.djvu/page124-1024px-Marie_de_France_-_Po%C3%A9sies%2C_%C3%A9d._Roquefort%2C_I%2C_1820.djvu.jpg)