Herberjat li Réis la nuit.
Quant repeirout de sun déduit,
Asez poeit à li parler,
Sun curage è sun bien mustrer ;
Mut la trova curteise è sage,
Bele de cors è de visage ;
De bel semblant è enveisie.
Amurs l’ad mis a sa maisnie ;
Une séiete ad vers li traite
Qui mut grant plaie li ad faite :
El quor li ad lancié è mise,
N’i ad mestier, sens ni cointise.
Pur la Dame l’ad si surpris,
Tut en est murnes è pensis.
Or li estut del’ tut entendre ;
Ne se purrat nient défendre.
La nuit ne dort ne se respose ;
Mès séï mêmes blasme è chose.
Allas ! fet-il, quel destinée
M’amenat en ceste cuntrée ?
Pur ceste Dame qu’ai véue,
M’est un anguisse al quoer ferue,
Qui tut le cors me fet trembler,
Jeo quit que mei l’estuet amer.
E si jo l’aim, jeo ferai mal ;
Ceo est la femme al Séneschal.
Garder lui deis amur è fei,
Si cum jeo voil qu’il face à mei.
Page:Marie de France - Poésies, éd. Roquefort, I, 1820.djvu/134
Cette page a été validée par deux contributeurs.
118
LAI D’ÉQUITAN.
![](http://upload.wikimedia.org/wikipedia/commons/thumb/7/7c/Marie_de_France_-_Po%C3%A9sies%2C_%C3%A9d._Roquefort%2C_I%2C_1820.djvu/page134-1024px-Marie_de_France_-_Po%C3%A9sies%2C_%C3%A9d._Roquefort%2C_I%2C_1820.djvu.jpg)