As fines de lur assembler,
Quant ensemble durent parler,
Li Reis feseit dire à sa gent
Que seignez iert privéement ;
Le us des chambres furent clos,
Ne troveissez hume si os,
Si li Rei pur li n’envéiast,
Jà une feiz dedenz entrast.
Li Séneschal la curt teneit
Les plaiz, è les clamurs oïeit ;
Li Reis l’ama mut lungement
Qui d’autre femme n’ot talent.
Il ne voleit nule espuser ;
Jà ne rovast oïr parler.
La gent le tindrent mut à mal ;
Tant que la femme al Séneschal
L’oï suvent, mut li pesa,
E de lui perdre se duta.
Quant èle pout à li parler
E èle li duit joïe mener,
Baisier, estreindre è acoler,
E ensemble od li juer,
Forment plurt è grant déol fist.
Li Reis demanda è enquist
Que deueit è que céo fu.
La Dame li ad respundu :
Sire, jo plur pur nostre amur,
Qui mei revert à grant dolur.
Page:Marie de France - Poésies, éd. Roquefort, I, 1820.djvu/144
Cette page a été validée par deux contributeurs.
128
LAI D’ÉQUITAN.
![](http://upload.wikimedia.org/wikipedia/commons/thumb/7/7c/Marie_de_France_-_Po%C3%A9sies%2C_%C3%A9d._Roquefort%2C_I%2C_1820.djvu/page144-1024px-Marie_de_France_-_Po%C3%A9sies%2C_%C3%A9d._Roquefort%2C_I%2C_1820.djvu.jpg)