Cette page a été validée par deux contributeurs.
LAI DU BISCLAVERET.
Quant de Lais faire m’entremet
Ne voil ublier Bisclaveret ;
Bisclaveret ad nun en Bretan,
Garwall l’apelent li Norman.
Jadis le poët-hum oïr,
E souvent suleit avenir,
Humes plusurs Garwall devindrent
E es boscages meisun tindrent.
Garwall si est beste salvage ;
Tant cum il est en cele rage,
Humes dévure, grant mal fait,
Es granz forest converse è vait.
Cest afère les ore ester
Del’ Bisclaveret voil cunter.
En Bretaine maneit un Ber
Merveille l’ai oï loer ;
Beau chevaliers è bon esteit
E noblement se cunteneit.
De sun Seinur esteit privez
E de tuz ses veisinz amez.
Femme ot espusé mut vailant
E qui mut feseit beau semblant.