De s’aventure vait pensant,
Et en sun curage dutant,
Esbahis est, ne set que faire,
N’en cuida jà à nul chef traire.
Il est à sun hostel venus,
Ses humes truve bien vestus ;
Icelement buen ostel tint,
Mès il ne seit dunt ce li vint :
Dans la vile n’eut Chevalier,
Ki de séjur éust mestier,
Qu’il ne face à lui venir,
E ricement e bien servir.
Lanvax duneit les rices duns,
Lanvax raiembe les prisuns,
Lanvax vesteit les jongléurs,
Lanvax feiseit les grans honurs.
N’i eut estrange ni privé,
A cui Lanvax n’eust duné ;
Lanvax eut mut joie et déduit
U seit par jur, u seit par nuit,
S’Amie puet véoir suvent,
Tut est à sun cumandement.
Ceo m’est avis, méisme l’an,
Après la feste Saint-Jehan,
Desi qu’à trente Chevalier,
S’èrent alé esbanoier,
En un vergié desous la tur,
U la Roïne ert à séjur.
Page:Marie de France - Poésies, éd. Roquefort, I, 1820.djvu/234
Cette page a été validée par deux contributeurs.
218
LAI DE LANVAL.
