Lanval s’en va autre part
Loins des autres ; mult li est tart
Ke s’Amie puise tenir,
Baisier, acoler è sentir ;
L’autre joïe prise petit,
Se il n’en ad le sien délit.
Quant la Roïne seul le voit,
Au Chevalier en voie droit,
Lès li s’asist, si l’apela,
Tut sun curage li mustra,
Lanval, mut vus ai honuré
E mult cieri è mult amé ;
Tute m’amur puez aveir,
Car m’en dites vostre vuleir.
Qant ma druerie vus otrei,
Mut devez estre liés de mei.
Dame, fet-il, laisciés m’ester
Jeo n’ai cure de votre amer,
Lungement ai servi le Roi,
Ne li vuel pas mentir ma foi !
Jà pur vus, ne pur vustre amur
Ne mefferai vers mun seignur.
La Roïne se cureçat
Iriée fu si mesparlat.
Lanval, fait-ele, bien le quit
Vus n’amez gaires ce déduit ;
Assez le m’a-t’un dit suvent
Que de femme n’avez talent.
Page:Marie de France - Poésies, éd. Roquefort, I, 1820.djvu/238
Cette page a été validée par deux contributeurs.
222
LAI DE LANVAL.
