Sire conpaing, ci en vient une,
Mais elle n’est fauve ne brune,
C’est la plus bele de cest munt
De tutes celes qui i sunt.
Lanvax l’oï, si suspira,
Bien la conut, sun cief leva,
Li sans li est muntés el vis,
De parler est auques hastis :
Par foi, dist-il, ce est m’Amie ;
Or ne m’est gaires que m’ocie,
S’ele n’en a merci de moi,
Car garis sui qant jeo la voi.
La Pucele entre ù palais,
Unques si bele ni vint mais,
Devant le Roi est descendue,
Si que de tus fu bien véue :
Sun mantel a laiscié caïr,
Que mix puissent sun cors véir.
Li Rois qui mut fu ensegniés
Il s’est encuntre li dréciés,
E tut li autre se levèrent,
E de li servir se penèrent.
Qant il l’eurent bien esgardée,
E sa biauté asez loée,
Ele parla en tel mesure ;
Car de demourer n’avoit cure.
Rois, g’ai amé un tien vassal,
Veéz le là, seignor, Lanval :
Page:Marie de France - Poésies, éd. Roquefort, I, 1820.djvu/262
Cette page a été validée par deux contributeurs.
246
LAI DE LANVAL.
![](http://upload.wikimedia.org/wikipedia/commons/thumb/7/7c/Marie_de_France_-_Po%C3%A9sies%2C_%C3%A9d._Roquefort%2C_I%2C_1820.djvu/page262-1024px-Marie_de_France_-_Po%C3%A9sies%2C_%C3%A9d._Roquefort%2C_I%2C_1820.djvu.jpg)