Cette page a été validée par deux contributeurs.
LAI D’YWENEC.
Puisque du Lai ai coumencié,
Jà n’iert par nul travail laissié ;
Les aventures que jeo sai
Tut prime vus les cunterai.
En pensé ai et en talant
Que d’Ywenec vus cunte avant ;
Dunt il fu nez, è de sun père,
Cum il vint primes à sa mère.
Icil qui gendra Ywenec
Il ot à nun Eudemarec.
En Bretaigne aveit jadis
Uns riches Huns vielz et ancis ;
De Caerwent fu avoez,
E du païs Sire clamez.
La cité si est sor Duglas,
Jadis i ot deul è trespas ;
Mut fu trespassez en aage.
Pur ce k’il ot bon héritage,
Fame prist pur enfans aveir
Qui après lui fussent si heir :
De haute gent fu la Pucele
Sage et curteise et forment bele,
