Amis, nul ne parole od li ;
Mès pour ce jeo irai saveir
Si jéo poeïe lui véeir,
Que jeo te puisse amener
Jeo te fereïe à li parler.
A la sale vient li Porters
Ni trova fors deus Chevalers,
Sur une grant table séeient,
Od uns granz eschés déduieent.
Hastivement retourne arère
Celui ameine en teu manère,
Que de nul ne ne fu scéuz,
Desturbez, ne aparcéuz.
A la chambre vient, si apele
L’us lur ovri une Pucele :
Cil sunt devant la Dame alé
Si unt le Cigne presenté.
Ele apelat un suen Varlet
Puis si li dit ore t’entremet
Que mis Cisnes seit bien gardez,
E ke il eit viande asez.
Dame, fet-il, k’il’ aporta,
Jà nul fors nus nel’ recevra,
E jà est-ceo présent réaus
Véez cum est bons è béaus.
Entre ses mains li baille è rent
El le receit mut bonement.
Le col li manie è le chief,
