Al renc se met encuntre lui,
Ensemble justèrent amdui :
Milun le fiert si durement,
Lansce dépièce vereiement.
Mès nel’ aveit mie abatu
Jà l’aveit lui tant si feru,
Que jus del’ cheval l’abati ;
De suz la ventaille choisi,
La barbe e les chevoz chanuz,
Mut li pesa k’il fu chéuz.
Par la reisne le cheval prent,
Devant lui le tient en présent,
Puis lui ad dit : Sire, muntez,
Mut sui dolent è trespensez,
Que nul hume de vostre eage,
Devreit faire tel utrage :
Milun saut sus, mut li fu bel,
Al dei celui cunuit l’anel,
Quant il li rendi sun cheval,
Il areisune le Vassal.
Amis, fet-il, à mei entent,
Pur amur Deu omnipotent !
Di mei cument ad nun tun père,
Cum as-tu nun, ki est ta mère ?
Saveir en voil la vérité.
Mut ai véu, mut ai erré,
Mut ai cerché en autres tères,
Par turneiemenz, è par guères,
Page:Marie de France - Poésies, éd. Roquefort, I, 1820.djvu/374
Cette page a été validée par deux contributeurs.
358
LAI DE MILUN.
![](http://upload.wikimedia.org/wikipedia/commons/thumb/7/7c/Marie_de_France_-_Po%C3%A9sies%2C_%C3%A9d._Roquefort%2C_I%2C_1820.djvu/page374-1024px-Marie_de_France_-_Po%C3%A9sies%2C_%C3%A9d._Roquefort%2C_I%2C_1820.djvu.jpg)