Eliduc fu primes nomez,
Mès ore est li nuns remuez,
Kar des Dames est avenu,
L’aventure dunt li Lais fu ;
Si cum avint vus cunterai
La vérité vus en dirai.
Eliduc aveit un Seignur
Reis de Brutaine la Meinur,
Qui mut l’amot è chérisseit
E il léaument le serveit.
Usque li Reis déust errer,
Il aveit la tere à garder.
Pur sa pruesce le retint,
Purtant de mauz mut li avint :
Par les forez poeit chacier,
Ni ot si hardi forestier
Ki cuntre-dire li osast,
Ne jà une feiz en gruscast.
Pur l’envie del’ bien de lui,
Si cum avient sovent d’autrui,
Esteit à sun Seignur medlez,
Empéïrez è encusez,
Que de la Curt le cungéa,
Sanz ceo qu’il nel’ areisuna.
Eliducs ne saveit purquei ;
Sovente feiz requist le Rei,
Qu’il escundist de lui préseist
E que losange ne créist.
