S’il le reçeit tut bonement,
E joius seit del’ mandement,
Séur séez de son amur ;
Il n’ad suz ciel Emperéur
Si vus amer bien le voliez,
Qui mut n’en déust estre liez.
La Dameisele respundi
Quant le cunseil oït de li :
Coment saurai par mun penser
S’il ad de mei talent d’amer,
Jeo ne vi unc nul Chevalier
Ki se féist de ceo prier ;
Si il amast, u il haïst,
Que volenters ne retenist.
Cil prisent k’hum li envéast
Mut harréie k’il me gabast,
Mès nepurquant pur le semblant,
Peot l’um conustre li alquant.
Aturnez-vus, è si alez :
Je sui, fet-il, tut aturnez.
Un anel d’or li porterez,
E ma ceinture li dunrez
Mile feiz si le saluerez.
Li Chamberlenc s’en est tornez.
Ele remeint en teu manère
Par poi n’el’ apelet arère,
E nekedent le lait aler,
Si se cumence à démenter.
Page:Marie de France - Poésies, éd. Roquefort, I, 1820.djvu/442
Cette page a été validée par deux contributeurs.
426
LAI D’ELIDUC.
![](http://upload.wikimedia.org/wikipedia/commons/thumb/7/7c/Marie_de_France_-_Po%C3%A9sies%2C_%C3%A9d._Roquefort%2C_I%2C_1820.djvu/page442-1024px-Marie_de_France_-_Po%C3%A9sies%2C_%C3%A9d._Roquefort%2C_I%2C_1820.djvu.jpg)