A vus revendrai volenters
Od grant efforz de Chevalers ;
De ceo l’ad li Reis mercié,
E bonement cungé doné.
Tuz les aveirs de sa meisun,
Li met li Reis en abaundun ;
Or, è argent, chiens, è chevaus,
E dras de seie, bons, è beaus ;
Il en prist mesurablement,
Puis li ad dit avenantment,
Qu’à sa fille parler ireit,
Mut volenters si lui pleiset :
Li Reis respunt : ceo m’est mut bel ;
Avant enveit un Dameisel
Qui l’us de la chambre ovri,
Eliduc vet parler od li,
Quant ele le vit, si l’apela,
E sis mil feiz le salua :
De sun afère cunseil prent
Sun eire li mustre brèvement,
Ainz qu’il li éust tut mustré
Ne cungé pris, ne demandé,
Se pauma-ele de dolur,
E perdi tute sa culur.
Quant Eliduc la veit paumer
Si se cumence à desmenter,
La buche li baise sovent,
E si plure mut tendrement ;
Page:Marie de France - Poésies, éd. Roquefort, I, 1820.djvu/462
Cette page a été validée par deux contributeurs.
446
LAI D’ELIDUC.
