Entre ses braz la prist è tient,
Tant que de paumeisuns revient.
Par Deu, fet-il, ma duce Amie,
Sufrez un poi ke jeo vus die,
Vos estes ma vie è ma mort,
E en vus est tut mun confort.
Pur ceo preng-jeo cunseil de vus,
Que fiance ad entre nus.
Pur busuin vois en mun païs,
A vostre père ai cungé pris,
Mès jeo ferei vostre pleisir
Quoi ke me deive avenir.
Od vus, fet-ele, me amenez,
Puis ke remaneir ne volez,
U si ceo nun me ocirai,
Jamès joie ne bien n’averei ;
Eliduc respunt par duçur,
Que mut l’amot de bon amur,
Bele, jeo sui par serement,
A vostre père veirement ;
Si jeo vus enmenoe od mei,
Jeo li mentirai ma fei ;
Desi k’al fine ki fu mis
Léaument vus jur é plevis,
Si cungé me volez doner,
E respit mettre, è jur nomer,
Si vus volez que jeo reivenge,
N’est rien al munde ki me tienge,