E il munta ; sa reisne prent,
Od li s’en vet hastivement.
Al hafne vient à Toteneis,
En la nef entrent demaneis ;
Ni ot hume si les suens nun
E s’Amie Guilliardun.
Bun vent eurent è bon oré,
E tut le tens aséuré ;
Mès quant ils durent ariver,
Une turmente eurent en mer :
E un vent devant eus leva,
Qui luin del’ hafne les geta,
Lur verge brusa è fendi,
E tut lur sigle desrumpi.
Deu réclement dévotement,
Seint Nicholas, è seint Clement,
E Madame Seinte Marie,
Que vers sun Fiz lur querge aïe,
Ke il les garisse de périr,
E al hafne puissent venir.
Un hure arière, un autre avant,
Issi alouent à costeant,
Mut estéïent près de turment.
Un des Déciples hautement
S’est escriez : quoi faimes nus ?
Sire, ça einz avez od vus
Cele par qui nus périssumes ;
Jamès à tere ne vendrumes.
Page:Marie de France - Poésies, éd. Roquefort, I, 1820.djvu/474
Cette page a été validée par deux contributeurs.
458
LAI D’ELIDUC.
