La Dame liève, si la prent,
Arière va hastivement :
Dedenz la buche à la Pucele
Meteit la flur qui tant fu bèle
Un petitet i demurra.
Cele revint è suspira,
Après parla, les oilz overi,
Deu, fet-ele, tant ai dormi.
Quant la Dame l’oï parler,
Deu cumencat à mercier :
Demande li ki ele esteit,
E la Meschine li diseit ;
Dame, jeo sui de Logres née,
Fille à un Rei de la cuntrée,
Mut ai aimé un Chevalier
Eliduc le bon soudéer.
Ensemble od li m’en amena,
Peché ad fet k’il m’enginna.
Femme ot espusé nel’ me dist,
Ne, uncques semblant ne m’en fist.
Quant de sa femme oï parler
De duel k’eus m’estuet paumer,
Vileinement descunseillée
M’ad en autre terre laissée.
Trahi m’ad è ne sai que deit,
Mut est fole ke humme creit :
Bele, la Dame li respunt,
N’ad rien vivant en tut le munt,
Page:Marie de France - Poésies, éd. Roquefort, I, 1820.djvu/492
Apparence
Cette page a été validée par deux contributeurs.
476
LAI D’ELIDUC.