Dedens son cuer l’en aama,
Sun Chanbrelenc en apela.
Diva, dist-ele, ne me celer[1],
N’as-tu suvent oï parler
Del’ bel Chevalier Graelent ?
Mut est amis à tute gent.
Dame, dist-il, mult par est prox
E mult se fait aimer à tox.
La Dame lués li respundi,
De lui veul faire mun ami :
Jeo sui pur lui en grant effrei,
Va, si li di qu’il vigne à mei,
M’amor li metrai à bandun.
Mout li dunrés, dist-cil, grant dun,
Merveille est se il n’en ad joie :
N’a si boin Abé dusque à Troie,
S’il esgardeit vostre visage
Ne changeast mult tost sun curage.
Cil s’en turna, la Dame lait,
A l’ostel Graelent s’en vait :
Avenamment l’a salué,
Sun message li a cunté
K’à la Roïne voist parler,
E n’ait cure de demurer.
Ce li respunt li Chevaliers,
Alés avant, biaus amis chiers.
- ↑ Diva, dame, sorte d’exclamation du latin diva.
