La Dameisele ot è entent
La parole de Graelent,
E voit qu’il est curteis è sage,
Buns Chevaliers è prox è large,
E set se il départ de li,
Jamais n’aura si boin Ami,
S’amur li a bien otreié ;
E il l’a ducement baisié.
A lui parole en itel guise :
Graelent, vus m’avés souprise,
Jeo vus amerai vraiement,
Mais une chose vus deffent,
Que ne dirés parole aperte,
Dunt notre amurs seit descuverte.
Jeo vus dunrai mult richement
Deniers è dras, or è argent,
Mult ert l’amurs bone entre nus.
Nuit è jur g’irai aveuc vus ;
Dalés vus me verés aler,
A mei purrés rire et parler,
N’aurés cunpaignun qui me voie,
Ne qui jà sace qui je soie.
Graelent, vos estes loiaus
Prox è curtois et assés biax :
Pur vus ving-jou à la fontaine,
Pur vus souferai-jou grant paine ;
Bien savoie ceste aventure,
Mais or soiiés de grant mesure.
