Gardés que pas ne vus vantés
De chose par qoi me perdés ;
Un an vus cunvenra, Amis,
Séjorner près de cest païs :
Errer poés dex mois entiers.
Mais ça seit vostre repairiers,
Pur çou que j’aim ceste cuntrée.
Alés vus ent, none est sonée (a),
Mun Mésage vus trametrai,
Ma vulenté vus manderai.
Graelens prent à li cungié,
Elle l’acole et a baisié.
Il est à sun ostel venus,
De sun cheval est decendus.
En une chambre seus entra,
A la fenestre s’apoia,
De s’aventure mut pensis.
Vers le bos a turné sun vis,
Un Varlet vit venir errant
Desor un palefroi anblant ;
Desi à l’ostel Graelent
En est venus q’ainc ne descent.
Au Chevalier en est venus,
E il est cuntre lui salus ;
Demande li dunt il veneit :
Cum aveit nun è qui esteit.
Sire, dist-il, ne dutez mie,
Jeo suis mésagés vostre Amie,