S’Amie voit lés lui aler,
A li se puet rire et juer.
La nuit le sent de juste lui,
Cument puet-il aveir anui ?
Graelent oire mult suvent ;
El païs n’a turneiement,
Dunt il ne seit tus li premiers,
Mut est amés des Chevaliers.
Or a Graelent boine vie
E mult grant joie de s’Amie ;
Se ce li puet lunges durer,
Jà ne devreit-el demander.
Ensi fu bien un an entier,
Tant que li Reis dut ostoier.
A Pentecuste chascun an
Semouneit ses Baruns par ban,
Tus cex qui de lui rien teneient,
E à sa Cort od lui mangeient :
Serveient le par grant amur.
Quant mengié aveient le jur,
La Roïne faiseit munter
Sor un haut banc è deffubler,
Puis demandeit à tus ensanble,
Segnur Barun, que vus en sanble ?
A sous ciel plus bele Roïne ?
Pucele, Dame ne Mescine ;
A tox le conveneit loer,
E au Roi dire et afremer
