Qui sur graïl èrent rostiz ;
Asquans en vit mis en espeiz
E rostis od souphre è od peiz.
Li Diable les rostisseient
Divers métaus sur eus fundeient,
Li autre Diable teneient
Maces de fer sis débateient.
Tute manière de torment
Vit sire Oweins en présent ;
De ses compaignuns ad véuz
Plusurs k’il a reconéuz,
Qui el siècle aveient esté,
Mès malement orent ovré.
Nul n’i purreit mustrer ne dire
Les plurs, è les criz, n’en escrire.
Cist champs n’ert mie solement
Pleins de la tormentée gent,
Ainz ert des Diables plusurs
Qui en esteïent tormenturs,
Entr’eus le pristrent, s’il voleient
Tormenter, mès il ne poeient
Le non Jhesu-Crist réclama
Par icel non se délivra.
Mult est cist nons duz à nomer
Par qui on puet se délivrer.
Iluec le menèrent avant
Un torment vit merveilles grant,
Page:Marie de France - Poésies, éd. Roquefort, II, 1820.djvu/466
Le texte de cette page a été corrigé et est conforme au fac-similé.
454
POÉSIES
