Cette page n’a pas encore été corrigée
Là où Dieu fut pour son âme imploré
Par Augustins, par Jacobins, et Carmes,
Et Cordeliers. Puis avec pleurs, et larmes
Enterré l’ont ses Parens, et Amys :
Et aussi tost qu’en la Fosse il est mis,
Et que sur luy Terre, et Tumbe l’on voit,
La fiere Mort, qui amené l’avoit,
Subtilement de là s’esvanouyt,
Et oncques puis on ne la veit, ne ouyt.
Tel fut conduyt dedans Bloys la Conté
L’ordre funebre, ainsi qu’on m’a compté.
Si l’ay comprins succinct en cest Ouvrage
Faict en faveur de maint noble courage.
S’il y a mal, il vient tout de ma part :
S’il y a bien, il vient, d’où le bien part.
De Madame Loyse de Sauoye, mère du Roy, en forme d’eglogue
(1531).
THENOT, COLIN
THENOT
En ce beau Val sont plaisirs excellens,
Un cler Ruisseau bruiant pres de l’ombrage :
