D'une grand Croix luy donna si grand choc,
Qu'il l'abbatit, et luy cassa le sucq.
Garde n'avoit de dire en ce defroc
Chantons Noel tant au soir, qu'au desjucq.
Quand je l'ouy frapper et tic et tac,
Et luy donner si merveilleux eschec,
L'Ange me dist, d'ung joyeulx estomach,
Chante Noel, en Françoys, ou en Grec,
Et de chagrin ne donne plus ung zec,
Car le Serpent a esté prins au bric:
Lors m'esveillay, et comme fantastic
Tous mes trouppeaulx je laissoy pres ung Roc.
Si m'en allay plus fier qu'un Archeduc
En Bethleem. Robin, Gaultier, et Roch,
Chantons Noel tant au soir, qu'au desjucq.
Prince devot, souverain Catholiq,
Sa maison n'est de pierre, ne de Bric.
Car tous les Ventz y soufflent à grand floc:
Et qu'ainsi soit, demandez à Sainct Luc.
Sus donc avant pendons soucy au croc,
Chantons Noel tant au soir, qu'au desjucq.
XII
De Caresme
Cessez Acteurs d'escrire en eloquence
D'armes, d'amours, de fables, et sornettes,
Venez dicter soubz piteuse loquence
Livres plainctifz de tristes chansonnettes:
N'escripvez d'or, mais de couleurs brunettes,
A celle fin que tout dueil y abonde.