Le texte de cette page a été corrigé et est conforme au fac-similé.
VI
Sy n’euz pas mon oraison faicte
Q’Amours, de sa grace et bonté,
Si me transmist une sajecte
Ardant et plaine de clarté,
Qui me mist au chemin hanté,
Dont de loing veis une chapelle,
Vers laquelle me transporté ;
Jamais n’en eschapé plus belle.
VI
Ainsy, pour Amours mercier,
Vers ceste eglise hastivement
Prins pays, sans me soucier,
Comme delivre de tourment.
Et cheminay sy longuement
Que j’arrivay devant la porte,
Qu’estoit de grant exaussement
Et d’ouvraige de mainte sorte.
VIII
Ceste église, faicte a pilliers
D’excellente magnificence.
Fondée estoit de cordeliers.
Religieux de l’observance,
Ayans renoncé l’aliance
Du noble service d’Amours,
Pour faire leens penitence
Jusques a la fin de leurs jours.
