« Or ça, » dit-il, « j’ay ja parlé
Au jour d’uy de vostre matiére,
Mais damp Prieur s’est est allé
Cy près ; il n’arrestera guére ;
Je vous asseure qu’il n’y a frére
Ceans qui ne vous aime bien,
Pour quoy devés faire grant chiére,
Car vostre besongne ira bien. »
Lors dist l’Amant : « La leur mercy,
De mon cas sont mal informez ;
Las, je n’ay fait, ailleurs ne cy,
Chose dont d’eulx doie estre amez ;
Mes biens fais sy sont clers semez ;
De moy ne leur en doibt challoir ;
Quant les auray acoustumez,
Je n’en porray que mieulx valloir. »
Tantost après cy arriva
Damp Prieur, venant de dehors,
Auquel damp Procureur luy va
Presenter le povre Amant lors,
Disant : « Pére misericors,
Vecy ung qui fain a de rendre
A l’ordre le cueur et le corps,
Se c’est vostre gré de le prendre. »
