cci
ii. — histoire de charles martel
105. — Comment la duchesse Berthe ala par devers le roy Charles Martel, et comment, par le moien de la royne, elle trouva fachon que le roy et le duc son seigneur eurent tresves ensemble pour huit ans entiers
106. — Comment le jeune prince Pepin fut fait empereur de Romme par le moien et pourchas du noble et puissant duc Monseigneur Gerard, duc de Roncillon et de Bourgoingne
107. — Comment le filz du puissant duc Gerard de Roncillon fut occis et jetté en un puis secrettement pour une parole qu’il dist, et comment la paix finale fut faitte du murdrier ou complice par force de guerre hastive et soubdaine
108. — Comment Berthe, duchesse de Bourgoingne, fist encommenchier la Magdalene de Vezelay, qui encoires est, de l’argent et grant tresor qu’elle y trouva par revelation
109. — Comment le duc Gerard de Roncillon fut en jalousie de la bonne dame Berthe sa femme, a grand tort, de ung sien escuier nommé Tamins, et comment il en fut a sa paix
Cy fine la table des rubriches de ce premier volume particulier, parlant
de la naissance et regne de Charles Martel, et des vaillances et
adversitez du tres recommandé prince et duc Monseigneur Gerard de
Roncillon.
(Fol. j.) Prologue declairant quy a fait grosser cestuy volume et autres trois, affin qu’il en soit perpetuelle memoire.
Les haulz, nobles et vertueulz fais des anciens doit l’en volontiers
oyr lyre et tres dilligamment retenir pour le bien et
prouffit que l’en y pœult acquerir, tant en proesse et chevallerie
comme autrement. Et pour ce que paroles sont tost passées et
escriptures demeurent permanentes, par lesquelles l’en peult
sçavoir les merveilleux fais jadis advenuz, ce que pas ne feust
se par cy devant les clercs et orateurs ne se feussent trés (v°)
diligamment employés a les descripre et mettre par ordre, par
le commandement et ordonnance de trés hault, trés excellent
et très puissant prince et mon trés redoubté et souverain
seigneur, tryumphant en gloire et en paix, Phelippe, par
