Merveilleusement fut joieux Anchier quant il ouy les nouvelles
du noble duc Gerard quy celle part venoit. Il assambla lors
le clergié et les notables bourgois de leans et leur declaira le
fait, dont tous furent joieux que plus ne pouoient, et se delibererent
d’aler au devant de luy en notable procession[1]. Et ainsi
fut le gentil duc Gerard receu de ses hommes, quy tant avoient
eu a souffrir pour sa guerre que desheritez en estoient les plusieurs
et en grant nombre, mais tous plouroient de joye pour
sa venue et lui offrirent leurs corps, leurs biens et leurs services
jusques au mourir. Si les eust le duc pour celle cause tellement
recommendez qu’en la fin il leur en fut de mieulx. Et quant il
se vit en Roncillon obey, et il sceut que le chastel estoit trés
bien garny de vivres et de bonne artillerie, il requist au notable
chevalier Droon et a son filz Anchier que ilz voulsissent parfournir
le commandement de la royne. Adont ilz firent par tout
e paijs assavoir la paix du noble duc, sa venue et l’aliance que
la royne avoit avecques luy, en leur priant que de gens ne luy
voulsissent faillir pour aler secourir Fourques, son cousin, en
Auridon, se les parens du duc d’Ardenne le vouloient par aucune
aventure aler illec assegier[2]. Et ilz luy manderent que de
ce ne se soussiast, et que ja ne luy fauldroient de gens, d’argent
ne de bon vouloir. Et adont le vaillant prince Gerard rendi
graces a nostre Seigneur de la bonté qu’il luy avoit par sa debonnaireté
faitte, comme d’avoir ainsi acquis l’amour (fol. vc xxix)
de la royne. Si se taist atant l’istoire du gentil duc Gerard, et
de ceulx de Roncillon, et parle de la royne qui estoit alée a
Orleans pour ouyr de toutes nouvelles et de ses anchiens ennemis.
.........................
.........................
Ainsi fut le duc hors de la pensée ou Atamins l’avoit mis a