En grant dolur e en grant guere,
E li reingnes en grant discorde,
Que pais ne trieve ne concorde
Ne justise n’i fu tenue,
Ainz fu la guere maintenue,
Si cruel e si longement
Que molt desplout a me[i]nte gent,
Quer aukun de[s] baruns se tindrent
Al rei Estiemble, e si maintindrent
Son bien e s’enor en toz poinz,
Por ce k’il ert reis e enoinz ;
Li autre disoi[e]nt por veir
Que cela qui ert del masle eir
Devoit la corone tenir
E le reaime maintenir.
Issi munte entre eus la meslée
Qui unkes ne fu demeslée
De si ke en ces entrefaites
I out mil armes de cors traites.
Par ceste achaison, ç’oï dire,
Li quens Patriz de Salesbire
Guerreia molt le Mareschal ;
Maint ennui li fist e maint mal ;
E li Mareschaz ensement
Li fist de granz ennuiz souvent,
Ker esi va de tel bargaigne :
Li uns pert, li autres gaaigne…
126 e, ms. ne. — 129 n’i, ms. ne. — 130 maintenus. — 131 Sil. — 142 desmeslée. — 146 patrit (i suscrit au-dessus du t). — 147 Merreschal. — 152 On voit par l’interruption du sens qu’il manque ici au moins deux vers. Toutefois, bien qu’on passe ici d’un feuillet à un autre, le ms. ne présente point de lacune.
