Que voulez-vous donc que je vous aprenne ?
Aprenez-moy l’Ortographe.
Tres-volontiers.
Apres vous m’aprendrez l’Almanach, pour ſçavoir quand il y a de la Lune, & quand il n’y en a point.
Soit. Pour bien ſuivre voſtre penſée, & traitter cette matiere en Philoſophe, il faut commencer ſelon l’ordre des choſes, par une exacte connoiſſance de la nature des Lettres, & de la diferente maniere de les prononcer toutes. Et là-deſſus j’ay à vous dire, que les Lettres ſont diviſées en voyelles, ainſi dites voyelles, parce qu’elles expriment les voix ; & en conſonnes, ainſi apellées conſonnes, parce qu’elles ſonnent avec les voyelles, & ne font que marquer les diverſes articulations des voix. Il y a cinq voyelles, ou voix, A, E, I, O, V.
J’entens tout cela.
La voix, A, ſe forme en ouvrant fort la bouche, A.
A, A, oüy.
La voix, E, ſe forme en r’aprochant la machoire d’enbas de celle d’enhaut, A, E.
